عورتوں کے عالمی دن پر

عورتوں کے عالمی دن پر
~~~~~~~~~~~~~~
(عورت کے نام )

میرے احساس کی وادی میں کلیاں مسکراتی ہیں
مگر میں چن نہیں سکتی
میں لمحوں میں سفر کرتی ہوں
تبندہ اُفق کے اس کنارے تک
جہاں آکاش دھرتی کو چومتا ہے
سانس لیتا ہے
میرے ہاتھوں کی ریکھاؤں میں
جانے کیسی زنجیریں پڑیں
روزِ اوّل سے
میں زنجیرِ آہن توڑ کر
روزِ ابد تک جا نہیں سکتی
میں کلیاں چن نہیں سکتی

مرے جذبوں کے نخلستان میں سبزہ سر اُٹھاتا ہے
ہوا دھیمے سُروں میں گنگناتی ہے
فضائیں رقص کرتی ہیں
خدا آواز دیتا ہے
میں سر نیہوڑا کے سنتی ہوں
دیار روح میں اک ان سنا نغمہ مچلتا ہے
میں اس نغمے کو لب تک لا نہیں سکتی
مری تپتے بدن پر
سبز شاخوں کی پھواریں سوکھ جاتی ہیں
مری آنکھوں کی جھیلوں میں
منور لارجوردی آسماں کا عکس ہوتا ہے
اُفق کے پار اک کھڑکی سی کھلتی ہے
سوادِ وقت کی ساری طنابیں ٹوٹ جاتی ہیں
مگر یخ بستہ دیواریں
مجھے ہر سمت سے یوں گھیر لیتی ہیں
میں پروازِ تمنّا کر نہیں سکتی
مری آنکھوں کو نیلا آسماں حسرت سے تکتا ہے

کئی عمریں گزار آئی
کئی دنیائیں چھان آئی
کئی صحراؤں میں نقشِ قدم چھوڑے
کئی دریا لہو کے پار کر آئی
کئی آتش کدوں میں جذب دل کندن بنا آئی
مگر اب بھی مری زنجیر آہن کھڑکھڑاتی ہے

مجھے جب جب بھی نیلا آسمان حسرت تکتا ہے
میں اپنے آتش دل سے جلا دیتی ہوں
اس زنجیر کی کڑیاں
ستاروں تک پہنچتی ہوں
مدارِ نور میں مہتاب کی ہم رقص ہوتی ہوں
(ساجدہ زیدی)

●◄ #صنم