روزہ ۔۔۔۔۔۔۔۔۔ اور ۔۔۔۔۔۔۔۔۔ تقویٰ کی صفت

( روزہ ۔۔۔۔۔۔۔۔۔ اور ۔۔۔۔۔۔۔۔۔ تقویٰ کی صفت ) ۔۔۔۔۔۔۔۔۔۔۔۔۔۔۔۔۔۔۔۔۔

روزے فرض کرنے کا اصل مقصد یہ ھے کہ انسان میں تقویٰ کی صفت پیدا ھو ۔۔ تقویٰ کے اصل معنی حذر اور خوف کے ھیں ۔۔۔ اسلامی اصطلاح میں اس سے مراد خدا سے ڈرنا اور اس کی نافرمانی سے بچنا ھے ۔۔۔۔۔۔۔۔
اس لفظ کی بہترین تفسیر جو میری نظر سے گزری ھے ، وہ ھے جو حضرت اُبی ابن کعب رض نے بیان کی ۔۔۔۔۔
حضرت عمر رض نے اُن سے پوچھا : تقویٰ کسے کہتے ھیں ؟"
انہوں نے عرض کیا : " امیر المومنین ، آپ کو کبھی کسی ایسے رَستے سے گزرنے کا اتفاق ھوا ھے جس کے دونوں طرف خاردار جھاڑیاں ھوں اور راستہ تنگ ھو ؟"
حضرت عمر رض نے فرمایا : " بار ھا ۔ "
انہوں نے پوچھا : " تو ایسے موقع پر آپ کیا کرتے ھیں ؟"
حضرت عمر رض نے فرمایا : " میں دامن سمیٹ لیتا ھوں اور بچتا ھوا چلتا ھوں کہ دامن کانٹوں میں نہ اُلجھ جائے ۔۔"
حضرت اُبی رض نے کہا : " بس اسی کا نام تقویٰ ھے ۔۔"

زندگی کا یہ راستہ جس پر انسان سفر کر رھا ھے ، دونوں طرف افراط و تفریط ، خواھشات اور میلاناتِ نفس ، وساوس اور ترغیبات ( Temptations ) ، گمراہیوں اور نافرمانیوں کی خاردار جھاڑیوں سے گھرا ھوا ھے ۔۔۔ اس راستے پر کانٹوں سے اپنا دامن بچاتے ھوئے چلنا اور اطاعتِ حق کی راہ سے ھٹ کر بد اندیشی و بد کرداری کی جھاڑیوں میں نہ اُلجھنا ، یہی تقویٰ ھے ۔۔۔۔۔
اور یہی تقویٰ پیدا کرنے کے لیے اللہ تعالیٰ نے روزے فرض کیے ھیں ۔۔۔۔

( سیّد ابوالاعلٰی مودودی رح ، اسلامی عبادات پر تحقیقی نظر )

ایڈمن#صنم