دعائے مصیبت

دعائے مصیبت کا اعراب ، پڑھنے کا وقت اور اس سے متعلق واقعہ

سوال

"اللّٰهم اجرني في مصیبتي و اخلف لي خیرًا منها."

اس دعا کا اعراب بتا دیجیے ۔ نیز  یہ دعا کب پڑھی جاتی ہے؟ اور اس سے متعلق واقعہ کیا ہے؟ 

جواب

مذکورہ دعا کا اعراب:

"اَللّٰهُمَّ اؤْجُرْنِيْ فِيْ مُصِيبَتِيْ وَأَخْلِفْ لِيْ خَيْرًا مِنْهَا "

 یہ دعا مکمل یوں ہے:

"إِنَّا لِلّٰهِ وَإِنَّا إِلَيْهِ رَاجِعُونَ، اَللّٰهُمَّ اؤْجُرْنِيْ فِيْ مُصِيبَتِيْ وَأَخْلِفْ لِيْ خَيْرًا مِنْهَا."

ترجمہ : بے شک ہم اللہ ہی کے لیے ہیں اور ہم اللہ ہی کی طرف لوٹنے والے ہیں، اے اللہ! میری مصیبت میں مجھے اجر دے اور اس کے عوض مجھے اس کا اچھا بدلہ عنایت فرما۔

حدیث کے مطابق یہ دعا  کسی بھی مصیبت اور پریشانی کے موقع پر پڑھی جاتی ہے۔ 

اس دعا کے بارے میں ام المومنین حضرت ام سلمہ رضی اللہ عنہا فرماتی ہیں کہ جب میرے شوہر ابوسلمہ کا انتقال ہوا تو میں نے اپنے جی میں سوچا کہ میرے شوہر مرحوم ابوسلمہؓ سے اچھا کون ہو سکتا ہے ، وہ سب سے پہلے مسلمان تھے جنہوں نے گھربار کے ساتھ رسول اللہ صلی اللہ علیہ وسلم کی طرف ہجرت کی ، (لیکن رسول اللہ صلی اللہ علیہ وسلم کی تعلیم کے مطابق) میں نے ان کی وفات کے بعد یہ دعا پڑھی تو اللہ تعالیٰ نے ابوسلمہؓ کی جگہ رسول اللہ صلی اللہ علیہ وسلم کی شخصیت مجھے نصیب فرمائی۔ (صحیح مسلم ومسند احمد ) فقط واللہ اعلم

فتوی نمبر : 144205200867

دارالافتاء : جامعہ علوم اسلامیہ علامہ محمد یوسف بنوری ٹاؤن