قرآن کریم کی کثرتِ تلاوت

رمضان میں کرنے والی تمام نیکیوں میں ایک اہم ترین مقام قرآنِ مجید کا ہے، کیونکہ رمضان اور لیلۃ القدر کی تمام فضیلتیں اسی کے نزول کے گرد گھومتی ہیں۔ یہی قرآن اس تمام خیر کا سرچشمہ ہے۔ اس لیے رمضان المبارک میں آپ صلی اللہ علیہ والہ وسلم کا قرآنِ مجید سے تعلق پہلے کی نسبت بہت بڑھ جاتا۔ آپ صلی اللہ علیہ والہ وسلم کثرت سے قرآن مجیدکی تلاوت فرماتے۔

جیسا کہ حدیثِ نبوی میں آتا ہے

«وکان جبریل یلقاه کل لیلة في رمضان حتى ینسلِخ، یَعرِضُ علیه النبيُّ القرآنَ»

''اور جبریل رمضان میں ہر رات آپ ﷺ سے ملاقات کرتے یہاں تک کہ رمضان ختم ہوجاتا۔ نبیﷺ آپ پر قرآن پڑھتے۔''

صحیح بخاری:1902

جبریل آپ کو قرآنِ مجید سناتے، جیسا کہ سیدنا ابوہریرہ رضی اللہ عنہ کی روایت ہے

«کان یعرض علىٰ النبي القرآن کل عام مرة فعرض علیه مرتین في العام الذي قبض فیه وکان یعتکف في کل عام عشرًا فاعتکف عشرین في العام الذي قبض فیه»

''ہر سال آپﷺ کو قرآن مجید سنایا جاتا اور جس سال آپ فوت ہوئے اس سال آپ ﷺ کو دو مرتبہ سنایا گیا اورآپ ﷺ ہر سال دس دن اعتکاف کرتے اور جس سال آپﷺ فوت ہوئے، آپﷺ نے 20 دن کا اعتکاف کیا۔''

صحیح بخاری:9998

سیدنا عبداللہ بن عمروؓ سے روایت ہے کہ آپ صلی اللہ علیہ والہ وسلم نے فرمایا

«الصیام والقرآن يشفعان للعبد یوم القیامة. یقول الصیام: أي رب منعته الطعام والشهوات بالنهار فشَفِّعْني فیه ويقول القرآن منعته النوم باللّیل فشفعني فیه قال فیشفعان»

''روزہ اور قرآن قیامت کے دن بندے کے لیے سفارش کریں گے۔ روزہ کہے گا اے میرے ربّ! میں نے اسے کھانے پینے اور دن بھر کی شہوات سے روکے رکھا۔ تو اس کے حق میں میری سفارش قبول فرما اور قرآن کہے گا: میں نے اس کو رات کی نیند سے روکے رکھا تو میری سفارش اِس کے حق میں قبول فرما۔ آپﷺ نے اطلاع دی کہ دونوں کی سفارش قبول کی جائے گی۔'' یعنی رمضان میں دن کا سفارشی روزہ اور رات کا سفارشی قرآن ہے۔

مسنداحمد : ج11؍ص6626